Novas da Amaía

Vizinhas da zona de Coruxido, em Briom, protestam polas molestias da empresa Ecowarm de Galicia.

2009-12-25T11:24:00.002-08:00

Há uns meses vizinhas da zona de Coruxido recolhérom assinaturas para protestar polas molestias que, desde o ano 2006 ocasiona esta empresa. Denunciam ruidos a primeiras horas da manhá e altas horas da noite.

Ecowarm de Galicia adica-se à densificaçom de biomasa e subprodutos da industria de 1ª transformación da madeira, para a elaboraçom de combustíveis "ecológicos" destinados tanto a uso doméstico como industrial. Posue umha planta industrial en San Xulián de Bastavales no lugar de Coruxido, no límite com o concelho de Rois

Comeza a sua actividade em 2006 se bem a instalaçom industrial já existia com anterioridade, mas é neste ano quando instala um novo silo e se adica à nova actividade sem licenza de nengúm tipo, segundo denunciam vizinhas afectadas. Aínda que a obra foi paralizada logo foi legalizada e continuou com a sua actividade. Nom está localizada em cham industrial, senom nas proximidades da aldea de Coruxido, rodeada de casas.

O transporte público nom chega à aldeia de Tarrio

2009-12-25T11:24:00.001-08:00

Já som anos de luita por um direito básico que ainda nom conquerirom, o do transporte público. Meio cento de Vizinhas manifestárom-se frente o Concelho de Ames denunciando "15 anos de enganos". Meiante uns 51 escritos no registo municipal demandam a extensom da linha do autocarro, que os exclue do seu percorrido por pouco mais dum kilómetro. Segundo expunha o presidente da "Asociación de Veciños Tras do Río", Carlos Trías, "levamos 15 anos com a mesma reivindicaçom e a Xunta e o Concelho passam-se a bola mutuamente. Parece que há umha mao escura, um meigalho ou pura cabezoneria para nom levar a cabo umha ampliaçom de linha de 1,2 kilómetros, numha estrada muito ampla, quando o autocarro remata o servizo em Firmistáns e está ali parado durante mais dum quarto de hora’’.

Oposiçom vizinhal a que instalem umha antena de telefonia móvel n´O Milladoiro

2009-12-25T11:23:00.000-08:00

A telefonia móvel experimentou um crescimento súbito na última década – ultrapassando o número de celulares ao de habitantes – que nom só revolucionou em certa medida os modos habituais de relacionamento social, senom que representou umha proliferaçom caótica das redes de telecomunicaçom e a multiplicaçom da poluiçom electromagnética. Cada vez mais colectivos e assembleias vicinais se organizam, um pouco por toda a parte na Galiza, para enfrentar a instalaçom de antenas de telefonia móvel perto das casas, em prevençom do risco de poluiçom provocada polas ondas electromagnéticas, desdenhado polas grandes empresas mas analisado em vários estudos científicos, e presumivelmente responsável por boa parte do aumento dos casos de cancro entre a populaçom.
No mês de Dezembro vizinhas do Milhadoiro iniciárom umha recolhida de assinaturas com a finalidade de paralizar a instalaçom dumha antena de telefonia móvel, que a empresa Telefónica Móviles España pretende pôr no número 32 da avenida Rosalía de Castro. Solicitam ao alcalde de Ames a paralisaçom das obras e a retirada da licença e instam a buscar umha nova ubicaçom longe do núcleo urbano. Alegam razons medioambientais e de saude pública.
Pola sua parte, o alcalde, Carlos Fernández, tivo umha reuniom com vizinhas de O Milladoiro para presentar "os informes -tanto do Ministerio de Ciencia e Tecnologia como da Conselharia de Sanidade- onde dim que estas antenas de móvel base nom som perjudiciais para a saude". Nessa reuniom mais dum cento de vizinhas se opugérom rotundamente e esigirom a retirada da licença.

Recomendamos a leitura deste artigo de José Vicente no Novas da Galiza nº26 (http://www.novasgz.com/pdf/ngz67.pdf)

Um complexo elitista chegará a Ames.

2009-12-25T11:19:00.000-08:00

O complexo de golfe do Aero Clube chegará a Ames e os terreios custarám perto de oito milhons de euros, ao que há que sumar uns 4,7 milhons da construcçom da sede. Esta cidade desportiva privada, que constará dum campo de golfe de 18 buracos, incluirá seis canchas de tenis, umha pista de pádel e la casa do clube, ademais de piscinas para nenas e adultas.
O vizinho de Ames José Ferreiro, gestionou a compra dos terreos do Aero Clube em Sam Mamede de Pinheiro. Trata-se dumha finca global de sesenta hectáreas que, segundo afirmam do Aero Clube, "dotarám ao Concelho de Ames da maior superfície desportiva da comunidade galega".
Na Galiza há na actualidade 19 campos de golfe e há previstos outros 17, a maioria deles ligados a infraestruturas hoteleiras e urbanizaçons de luxo.
Várias associaçons ecologistas se oponhem e opugerom a este tipo de superfícies por formar parte dum proceso de turistificaçom que fai negócio com a Terra. Apontar que o consumo médio diário de água dum campo de golfe é o equivalente ao de 8000 vivendas familiares.

Morre o companheiro Muntxaraz

2008-07-14T11:52:00.000-07:00

O Domingo 29 de Junho, morreu Ramom Muntxaraz. Histórico militante independentista, companheiro da Fouce e vizinho de Bertamiráns, finou após messes de luita contra umha enfermidade contra a que pelejou com enteireza.
Estudoso, solidário com as e os reprimidos polo Estado espanhol ao longo de toda a sua vida, compartiu até o último momento com nós a sua experiência e compromiso com a luita pola liberdade do povo trabalhador galego.
"As pessoas que luitam dias e som boas, hai-nas que luitam meses e som melhores, mas as que luitam toda a vida, essas som as imprescindíveis".

Retiradas placas fascistas da igreja de Ortonho

2008-05-26T12:03:00.000-07:00

Nova tirada do periódico “O Pedroso"

Segundo informaçons recolhidas por NÓS-UP na noite da segunda-feira 3 de Março fôrom retiradas as três placas fascistas de um monólito do recinto da igreja de Ortonho .Umha das placas tem a inscriçom "Para los caidos por Dios y por la patria una oración y un recuerdo. Ortoño 1940", outra está dediacda a José Antonio Primo de Rivera e reproduz os nomes de nove vizinhos da paróquia mortos no bando franquista.
A campanha contra a simbologia fascista continua no nosso País perante a passividade institucional após a aprovaçom da morna lei da "memória histórica".

Concelho de Ames coarta liberdade de expressom

2008-05-24T14:17:00.000-07:00

Vam já mais de dous anos desde que o Concelho de Ames decidiu, polo consenso dos partidos políticos, proibir o uso das paradas da autocarro para a propaganda de todo tipo, incluido o das associaçons e colectivos como o nosso. O servizo de limpeza tem a orde de arrincar todo, chegando incluso ao paradoxo de arrincar os próprios cartazes do concelho. Assi, por um lado, concelharias como a de cultura deixam quartos em propaganda que é arrincada no mesmo dia polo concelho. Tras várias chamadas de atençom, personando-nos nas concelharias, botam balons fora. Vivemos numha situaçom de censura permanente. Sem nengumha licença aprovada, decide-se arrincar todo. Onde estám os paneis prometidos? É esta a comunicaçom social do Concelho de Ames??
E nom é o único que podemos criticar. Há meses que pedimos a realizaçom dum programa na rádio “pública” Radio Ames, e nom há resposta.
Pedimos também permiso para pôr umha mesa informativa na praça do Concelho, e outro tanto. Que é o que temos que fazer para podermo-nos expressar? Que alguém explique isto.

A ANPA do CEP Ventim fai pública a grave situaçom de desatençom e massificaçom do colégio.

2008-04-29T16:51:00.000-07:00

A associaçom denúncia que nom estám atendidas as necessidades educativas do CEIP Ventim por falta de pessoal, em quanto a número de nenas/os (há 70 nenos/as com necessidade de apoio educativo, dos quais se conseguem atender apenas 37) , horas que se adicam e apoios e duraçom dos apoios, especialmente as necessidades educativas do alunado estrangeiro (desconhecemento de umha ou duas línguas, desfase curricular e dificultades de adaptaçom). Isto complica-se com problemas de absentismo e baixas associadas a situaçons precariedade social (tanto a nível laboral, como psicológico e de lezer).

A cuitelada definitiva

2008-04-13T18:08:00.000-07:00

Hoje os habitantes da Amaía que ficamos sem lobotomizar pola ditadura do automóvel privado temos de abrir os olhos a umha desagradável realidade. A autovia que estragou um anaco das nossas vidas já nom vai ser um carreiro polo qual cruzamos furtivamente coa esperança de que nom nos vejam os seguranças da obra. Desde o passado Fevereiro, para além dumha horrível fenda que parte o monte em dous e ameaça o rio, o delírio dos politicalhos dos três partidos do sistema materializa-se num horrível enxame de veículos. Noutras palavras: abre ao tránsito a autovia Compostela-Briom.Esta via de comunicaçom, que no futuro se prolongará até a ria de Noia, já ergueu umha boa poeira, tanto no sentido literal como do ponto de vista da irritaçom popular. E nem só houvo protestas no concelho de Ames polo referente ao rio Roxos. Também os vizinhos da Rocha tivérom queixas ao respeito. E a nível individual, todo o percurso da nova estrada está revestido de pessoas descontentes.Ainda sem irmos à raiz do problema, sem propormos um modelo de transporte o mais comunitário e o menos poluente possível -que seria a questom-, queremos deixar clara a nossa impressom de que parece que o traçado da autovia se realizou coa ánsia de estragar os espaços mais valiosos da nossa zona. Por riba, os políticos nem conhecem estes lugares e fam ouvidos xordos quando alguém pede a sua protecçom.Até aqui todo foi um grande negócio, é verdade. Mas o realmente suculento está por vir. Esta nova via reduzirá o tempo de duraçom dos trajectos dos apresurados e compulsivos visitantes foráneos. E esta circunstáncia acelerará a destruiçom dos montes e aldeias que se encontram nas margens desta via, a cavalo entre a hiperturistificada Compostela e a potencialmente massificada ria de Muros e Noia. Para mostra os incêndios do verao passado. Aos politiquinhos traidores e aos especuladores profissionais só nos resta dizer-lhes umha cousa: que vos aproveite o vosso negócio especulativo. A ver se empachades com ele.

Vizinhanza indignada exerce presom no pleno do Concelho de Ames o passado 28 de Março

2008-04-06T18:47:00.001-07:00

Afectados/as polas obras dumha constructora, trabalhadores com os direitos incumpridos, e vizinhos/as sem direito a um instituto no Milhadoiro mentres os partidos aprovam a construcçom dum macro-quartel da Guardia civil num dos poucos espaços verdes que ficam...Vizinhos/as afectados/as pola construcçom de mais umha obra urbanística na rua Rueiro, em Bertamiráns apresentárom-se no pleno do Concelho do passado 28 de Março. Nom eram os únicos, ali irrumpírom vizinhos/as do Milhadoiro com umha faixa pedindo menos especulaçom e mais educaçom, quando levam anos recevendo promesas dos politicos e nom vem um mísero instituto para umha populaçom tam importante como o Milhadoiro (ademais da massificaçom do colégio de Ventim), mentres estes cedem terreios à Guardia Civil no pouco que fica de verde na vila. Também estavam ali os trabalhadores/as do concelho que vem os seus direitos laborais incumpridos.Carlos Fernández e companhia (PP e BNG incluidos) da mao de empresários, construtores e forças militarizadas: "Ames avanza" cara a especulaçom, a repressom e a precariedade.

Vizinhanza é desalojada por um movimento de terras provocado pola construcçom de mais umha obra urbanística em Bertamiráns.

2008-04-06T18:11:00.000-07:00

Na madrugada do passado 27 de Março, produziu-se um afundimento provocado pola constucçom dum complexo residencial na rua Rueiro de Bertamiráns, danando as tuberias do gas natural e de auga municipal. As residentes de 40 pisos tivérom que abandona-los sem nengum tipo de acolhida durante mais de seis horas, e o gas nom foi reposto até passada a meia-noite. Ao parecer, nom foi o primeiro corremento de terra que se produze. É de suponher a indignaçom popular, mentres a mafia urbanística construe enriba de branhas para especular, havendo edifícios deshabitados e com preços totalmente inaccesíveis para a gente comum. Bertamiráns leva anos sendo "terra das oportunidades" para politicos ex-promotores como Carlos Fernández e inmobiliárias como a antiga Mahia (agora Gexpa-Maexpa) que crescérom da mao do governo do fascista Astray e que hoje tenhem propriedades até em Latinoamérica. É representativa esta obra, que se construe pegada a casas de pedra rurais (veja-se o hórreo da foto) do que acontece, aconteceu e seguirá a acontecer (se nom o paramos já) por mor do urbanismo salvage.

MULTAS DE CENTOS DE EUROS POR DENUNCIAR A TORTURA NO ESTADO ESPANHOL

2007-09-04T12:41:00.000-07:00

Existe no Val da Amaía a liberdade de expressom?

Perguntade-lhe à Guardia civil.

Durante o mes de Setembro vários/as rapazes/as de Bertamiráns, membrosdo Centro Social A Fouce, receviam nas suas casas umha multa a cadaum/ha de 150 euros por cabeça. O seu delito: sair à rua com umha faixa denunciando as torturas que recolhem organismos europeios como Amnistia Internacional, que sumam centos de casos, e que se producemnas comisarias e cárceres do estado espanhol. Na Amaía, os actos perseguidos nom som a corrupçom urbanística nemo narcotráfego, nem os abusos patronais. Na Amaía persegue-se,identifica-se, cachea-se mensalmente a estes jovens por colar cartazesou mobilizar-se. Por dizer O QUE NOM QUEREM QUE SE SEPA.

A REPRESSOM POLÍTICA NOM OS VAI PARAR

STOP TORTURAS NO ESTADO ESPANHOL E NO MUNDO GUARDIA CIVIL: REPRESSOR DA JUVENTUDE E D@S TRABALHADORES/AS.

2007-07-05T05:35:00.000-07:00

Mobilizam-se trabalhadoras de Froiz contra a precariedade.

A imprensa empresarial diz-nos que o paro desce na Galiza, mas nom fala demasiado do emprego que se gera. Neste país com serviços hipertrofiados, cada vez som mais os sectores que denunciam precariedade. Hotéis, lojas, restaurantes, estabelecimentos de comida lixo, grandes áreas comerciais...Agora som os supermercados Lorenzo Froiz que incumprem o convénio. A CIG anuncia umha folga para o dia 7 de Julho.
Há quinze dias despediu-se umha trabalhadora por se negar a trabalhar mais horas que as estabelecidas. É o detonante dumha situaçom de abusos permanentes, com horários excessivos, horas extras nom pagas e baixos salários. É a tónica no sector, mas em Froiz há capacidade para mobilizar.
Práticas negreiras.
Froiz, segundo dizem fontes da CIG, nunca acedeu a negociar. As poucas conquistas que se lhe arrincárom fôrom a mobilizadora e as denúncias na inspecçom e nos julgados. A CIG leva várias vitórias por esta via, mas aguarda que a greve seja um ponto de inflexom para ir ainda mais longe.
A precariedade como barreira.
Como adoita acontecer nestes conflitos, som os trabalhadores e trabalhadoras de maior antiguidade os que puxam polo resto, mais vulneráveis, e com menos experiência sindical. Quem está a dar um apoio inesperado à mobilizaçom som os clientes. Levam-se recolhidas mais de 2000 assinaturas, que se entregarám ao final à direcçom da empresa.O dia 24 está preparada umha nova jornada de greve.

Conflito laboral em Limpezas Ames

2007-06-24T05:43:00.000-07:00

No mês de Maio do 2006, as trabalhadoras de Limpezas Ames informárom a CIG de que padeciam diversas irregularidades laborais. Como exemplo destas irregularidades, avonda dizer que o tempo que tinham destinado a limpar dependências municipais eram obrigadas a limparem vivendas particulares.
No mês de Outubro, começárom os atrassos nos cobros dos salários. A CIG contacta entom co alcalde Carlos Fernández, quem explica que o problema é da empresa. Contodo, o concelho prometera mudar de contrata desde o passado Setembro, cousa que se incumpriu.
Pola sua banda, a empresária bota-lhe a culpa ao concelho, que segundo ela é quem nom paga. O concelho nega em redondo esta afirmaçom.
A última vez que as trabalhadoras de limpezas Ames cobrárom o seu salário foi no passado mês de Janeiro. Entre a empresa e o concelho acusam-se mutuamente de nom pagar. Entom a CIG remete umha comunicaçom aos grupos governantes em Ames, BNG e PSOE. Este último nega-se a dá-lo por recebido.
Cumpre salientar que as trabalhadoras de Limpezas Ames tenhem um tempo de vacaçons mui inferior ao que seria normal no seu ramo (só duas semanas) e cobram bastante menos que outras trabalhadoras e trabalhadores que desenvolvem a mesma actividade.
Desde a Fouce, queremos denunciar as atitudes criminais e fascistas da empresa e do concelho (que pouca vergonha a dum concelho que se minte de esquerdas e nacionalista) e solidarizar-nos coa justa luita que estám a levar as trabalhadoras de Limpezas Ames. Adiante, companheiras !

Mais queixas contra a autovia

2007-06-24T05:42:00.000-07:00

Às seis da tarde do dia 21 de Abril, vizinh@s de várias aldeias do concelho de Ames concentravam-se diante da planta de asfaltados estabilizados que hai nas obras da nova autovia Compostela-Briom. A vizinhança assegura que esta planta lhes está a causar graves problemas, devido à sua proximidade dum grupo de vivendas. Tamém denunciam que as instalaçons nom tenhem licença de actividade industrial e incumprem a legislaçom existente a nível ambiental.
As devanditas instalaçons prejudicam os lugares de Framil e Costoia, ademais das aldeias compostelanas de Lamas e Pardinhas. A pltaforma constituída por vizinh@s destes quatro lugares puxo umha denúncia por delito ambiental e solicita a retirada da planta, pois segundo a lei nom pode estar a menos de dous quilómtros dumha zona habitada.
Segundo a vizinhança da zona, a Conselharia de Política Territorial "só nos trata de tranquilizar" e a concesionária da autovia "incumpre a lei e pretende pisar os nossos direitos".

Ultradireita sociológica organiza "gallegos" anti-galegos

2007-06-24T05:39:00.000-07:00

O auto-ódio e xenofobia anti-galega dalgumhas pessoas que respondem a este gentilício resulta ser mesmo abafante nalgumhas ocasions. Ainda sendo insuficiente a legislaçom que supostamente defende a nossa língua,(para além do facto de esta nom se cumprir nem de longe), grupos de ultras organizam-se contra o que consideram tentativa de imposiçom da nossa língua por parte da Junta da Galiza.
O colectivo que se dá a si mesmo o nome de "Tan gallego como el gallego" assegura ter recolhido dez mil assinaturas pola Galiza adiante. Os promotores da iniciativa anti-galega adevertem de que se está a produzir umha plena galeguizaçom no ámbito do ensino, perigando a presença do espanhol nas escolas e institutos da Galiza. Segundo eles, isto discrimina as pessoas nom galegofalantes.
Esta reacçom deve-se ao já de por si raquítico decreto de normalizaçom lingüística consensuado no parlamentinho do Hórreo entre PP, PSOE e BNG. É curioso ver como os avances na normalizaçom lingüística, embora tímidos e insuficientes, fam erguer as vozes daqueles que querem ver a nossa língua morta e soterrada dumha vez para todas.
Da Fouce também convidamos o povo da Amaía e o povo galego em geral a lhe mostrar a estes ultras com pretensons lingüicidas o que pensamos deles. Cumpre defender a única língua própria do nosso país perante esta rança ofensiva espanholista. As geraçons dos nossos pais e avôs levou muitas vareadas de vímbio nas mans por falar na escola a única língua que conheciam. No passado, o nosso povo padeceu todo tipo de abusos e vexaçons por este motivo. E agora garantir que a metade de aulas sejam em galego é umha imposiçom. Por este caminho, aonde imos chegar?

Manifestaçom pola defesa da Terra

2007-06-24T05:22:00.001-07:00

Perto de 4.000 pessoas reunírom-se o passado 5 de Maio em Compostela em protesta contra os reiterados ataques à nossa terra e o nosso mar por parte dos poderosos. A legenda escolhida foi "Galiza nom se vende. Terra viva e vida digna para tod@s". Na manifestaçom, os principais grupos políticos (PP, PSOE, BNG) fôrom duramente criticados pola sua responsabilidade na destruiçom do território galego. Contodo, o alvo principal das críticas foi o presidente do governinho de S. Caetano, senhor Pérez Touriño.
Na marcha, secundada por 40 grupos ambientalistas, tanto locais como de carácter nacional, fôrom cantadas consignas como "Fora da Galiza Portos do Estado" ou "O nosso país nom é para os ricos de Madrid". Também houvo berros contra a declaraçom de supramunicipalidade no tocante às piscifactorias de Quilmas (Carnota) e Baronha (Porto do Som).

Homenagem a Líster

2007-06-24T05:22:00.000-07:00

Nos passados dias 13 e 15 de Abril, a associaçom A Oliveira de Teo organizou umha homenagem ao combatente comunista galego Enrique Líster. Neste acto, foi colocada umha placa comemorativa na casa do que chegaria a ser general do Exército Vermelho, na aldeia de Ameneiro (Calo).
No remate do acto, o filho e o sobrinho de Líster descobrírom umha placa na que se lê: "Nesta casa nasceu Enrique Líster (1907-1995) canteiro que sonhou e luitou por um mundo melhor". Ao remate do acto, a Banda da Sociedade Recreativa de Calo interpretou o Hino Galego e a Internacional.

GUARDIA CIVIL PERSEGUE RAPAZES/AS DO CENTRO SOCIAL A FOUCE

2007-05-11T12:15:00.000-07:00

O passado 10 de Maio efectivos da Guardia Civil activos às 20 hh. (negárom-se a dar o seu número acreditativo) abordava quatro rapazes/as do Centro Social A Fouce que transitavamos por Bertamiráns colando cartazes da Festa do Dezassete... que se fai o doze organizada polo Centro Social O Pichel, e com a qual colaboramos. Tras a negativa dos agentes a explicar o motivo da retençom, estes procederom a registar-nos e identificar-nos um/ha por um/ha, de jeito totalmente arbitrário e autoritário.
Queremos dizer que estamos fartos/as de situaçons coma esta. Cada vez que saimos à rua a fazer vissíveis os nossos actos e as nossas ideias, temos que aturar identificaçons e registos que impedem a nossa livre circulaçom e coaccionam a nossa livre expressom. Durante o ano que levamos funcionando como Centro Social, practicamente todos os meses algum/ha de nós vê-se abordado mentres realizamos actividades sociais e culturais.
Justo nestas datas de campanha eleitoral, perguntamo-nos se lhes acontecerá o mesmo a quem cola a propaganda dos/as politiqueiros/as de turno. Sabendo que esta é umha situaçom totalmente ilegal, que as autoridades semelham nom querer resolver, queremos dizer que seguiremos a sair à rua aconteça o que aconteça e que nem Guardia Civil nem Policia Local nos vai impedir construir e extender espaços de liberdade e solidariedade no Val da Amaía.

POLA NOSSA LIBERDADE DE EXPRESSOM
NENGUMHA AGRESOM SEM RESPOSTA

Guardia civil agrede rapaz em Bertamiráns

2007-02-18T16:48:00.000-08:00

No mês de Dezembro, uns cartazes anónimos colados por Bertamiráns denunciavam um caso de agressom da Guardia civil em colaboraçom da Polícia local a um moço que responde às iniciais de D.M. nas imeiaçons do Paço da Peregrina. O rapaz, arbitrariamente identificado, foi ameaçado, humilhado, coaccionado e agredido, tras do qual o deixárom marchar. Parece que nom é o único caso, e que mais de um/ha jovem está a denunciar ao longo do país situaçons coma esta.

(Na imagens, alguns picoletos de Ames e mais autoridades, entre elas o alcalde)

Regidor de Ames confirma construcçom de novo quartel da Guardia Civil

2007-02-12T08:56:00.000-08:00

O Ministerio de Interior, organismo do qual depende a Guardia Civil, dava luz verde à construçom de um novo quartel na localidade. O novo quartel ocupará um solar de 3000 metros quadrados que cámara municipal ofereceu a Interior para "demonstrar o seu interesse pola execuçom do projecto". Segundo fontes jornalísticas, o quartel terá 37 agentes e vivendas para os guardas. O custo do projecto ascenderá, segundo o primeiro projecto técnico, a 1,25 milhons de euros. A Guardia Civil passará de ocupar um baixo comercial a trabalhar num edificio com três andares duns 760 metros quadrados (incluidos calabouços e sala de interrogatórios) No entanto, outros projectos de obras públicas no Milhadoiro como um colégio público podem seguir esperando a sua execuçom. O Concelho de Ames tem doado umha parcela de 4000 metros quadrados na que se ubicará o quartel e a zona de vivendas para os guardas e as suas famílias.Está previsto que no plantejamento urbanístico do quartel se deixe a porta aberta a futuras ampliaçons "ante um previsível incremento da demanda de agentes" e será supervisado na construçom pola próprio instituto armado por razons de segurança.O regidor municipal, Carlos Fernández (PSOE) assinalou a grande importáncia que tem para Ames a construçom do novo prédio.

Aprova-se no Concelho a elaboraçom dum convénio para a construcçom do quartel

O pleno do Concelho de Ames abordou a aprobaçom dum protocolo para a construçom da casa quartel. Este protocolo de colaboraçom entre o Concelho e a Gerencia de Infraestructuras y Equipaciones de Seguridad del Estado recolhe o compromisso do ente municipal de redactar o projecto, assumir a direcçom a obra e a sua coordinaçom em matéria de seguridade e saúde. Ademais, o Concelho porá também à disposiçom da Guarda Civil os terrenos para construir no recinto seis pisos de três dormitórios e dous apartamentos.

Desestruturaçom territorial em Briom

2007-02-12T08:06:00.000-08:00

Segundo dados do concelho de Briom pertencentes ao 2005, arredor do 80 % da populaçom está assentada nas parroquias da parte baixa do municipio (as mais achegadas à expansom urbanística de Bertamiráns) mentres a parte alta está a ser paulatinamente despovoada. Assi, a parróquia de Os Ánxeles, tem quase 2500 habitantes dos 6.958 que estám censad@s em Briom. Para a parte norte fica pouco mais do 20 por cento d@s habitantes, repartid@s sem grandes diferencias entre as parroquias de Luanha, Cornanda, Viceso e Ons. Nesta zona a populaçom é maiormente envelhecida, vinculada à vida rural e com aldeias completa ou practicamente desabitadas. O futuro de Briom parece agudizar estas diferenças. Com a especulaçom urbanística, na que joga muito a construçom da autovia, a desestruturaçom populacional afecta cada vez mais às questons relativas ao modo de vida, cultura e identidade d@s brioneses/as.

Repressom sobre os movimentos sociais

2006-06-03T21:07:00.000-07:00

Durante o mês de Maio a polícia local de Ames identificava sem razom aparente a dous membros do Centro Social na Praça de Chaviám. Os dous sócios estavam a trabalhar na construcçom do actual centro social quando dous polícias locais os parárom e lhes esigírom que baixassem do carro. Um dos sócios, A.M.P., seria também identificado, retido e registado o seu carro durante mais dumha hora numha estrada de Compostela durante algo mais dumha hora durante a última semana de Maio. O organismo popular antirepressivo Ceivar vem de fazer pública umha denúncia no seu web.

Mas algo ainda mais grave aconteceu durante este mês: a guardia civil detinha em Ourense a R.L.Q, activista do centro social A Esmorga, dentro da operaçom de perseguiçom política "Operación Castiñeiras" que a Guardia Civil leva a cabo contra jovens independentistas galeg@s, cum proceso judizial aberto desde há meses e que ainda está em segredo de sumário, e que pisa os direitos de pessoas que tenhem umha actividade pública e solidária.

O CS A Fouce quer chamar, como outros muitos colectivos sociais e culturais à denúncia destes feitos e à solidariedade activa. Poderám-nos quitar a liberdade mas nunca as ideias.

Manifestaçom d@s alun@s do IES de Ames contra a presença policial

2006-02-21T12:19:00.000-08:00

0 passado 6 de Fevereiro por volta duns 70 moços e moças do IES de Ames manifestárom-se em contra da abussiva presença policial na escola,acçompropulsada pola Assembleia de Alunas/os de dito centro. Entre berros de“madeiros repressores” as rapazas e rapazes ali presentes impedírom acirculaçom do tránsito e saírom polas ruas abaixo repartindo umha brochurainformativa que reflexava a repressom que estám a viver constatemente nasentradas,saídas e arredores do recinto escolar, assi como o máximo interêsque tenhem os efectivos policiais em procurar todo tipo de informaçom comrespeito a actividade social, política e mesmo estudiantil do alunado.A concentraçom concluiu sem incidentes e nom houvo intervençom policial.O passado mês de Janeiro o governo espanhol começou a aplicar um plano estratégico de resposta policial nas escolas, despregando mais de 300 agentes dos corpos da Guardia civil e Polícia Nacional nos centros educativos da Galiza, todo com a excusa da venda de drogas e a conflitividade social. Desde A Fouce de Ouro, queremos mostrar o nosso máximo apoio a estetipo de iniciativas e animar aos/às alun@s do instituto de Ames a que sigama tomar a palavra, pois a repressom nom é soluçom, se nom um mais um problema.

Sinistralidade laboral aumenta mais dum 30% no Concelho de Briom

2006-02-20T15:25:00.000-08:00

Segundo as últimas estadísticas oficiais de sinistranidade laboral, na Comunidade Autónoma Galega registárom-se 48.041 mortes no trabalho, a cifra mais alta desde o ano 1995. Este balance coloca os servizos e e a construcçom como os sectores que mais sinistralidade registam em termos absolutos, com 1180 mortes e 780 mortes respectivamente. Segundo estes datos, no concelho de Briom registariam-se até um 30 por cento mais de mortes, mentres que no de Ames a cifra teria baixado até um 10 por cento. Estas cifras alarmantes somariam-se a outras pertencentes a danos e lessons psíquicas e físicas, todas conseqüência dum mercado laboral caracterizado pola precariedade e no que as duras condiçons de trabalho e a búsqueda do máximo benefício pola patronal marcam a pauta.

Macro insfraestruturas planejadas sobre Amaía

2006-02-20T14:53:00.000-08:00

O presidente da Xunta, Emilio Pérez Touriño, inaugurou o 18 de Janeiro a autovía AG-56, que unirá Santiago d Brión em abril de 2008, acompanhado da conselheira de Política Territorial, María José Caride; os alcaldes de Santiago, Ames, Brión e Teo, assi como responsáveis da concesionaria Santiago-Briom, entre eles o presidente desta, Victor Revuelta. Dezenas de vizinh@s achegárom-se à inauguraçom da obra para perguntar polos baixos preços das expropriaçons,(mais de 2000 em total, muitas de uso agrário) mas nom fôrom atendid@s. A autovía terá 12,6 kilómetros e umha velocidade máxima de 100 kilómetros horas. Custará 108,8 milhons, e inclue 19 viaductos, assi como enlaces para Santiago, Pardinhas, Bertamiráns Leste e Norte, Brión e AC-543, ademais dumha rotonda com conexom cara Negreira. Por outra parte, o Ministerio de Fomento anunciou a licitaçom das instalaçons de seguridade no tramo do eixo atlántico do ferrocarril de alta velocidade Santiago-Osebe-A Escravitude, que corresponde a um trazado de 14 kilómetros da saída sul de Compostela. A actuaçom afecta aos térmos municipais de Santiago, Ames, Teo, Rois e Padrom, e custará 5,8 milhons de euros, cum praço de execuçom de dez meses. Os principais partidos políticos mostram o apoio a ambas macro obras, mentres fontes vizinhais anunciam a posta em marcha de organismos populares a favor de meios de transporte alternativos e contra a destrucçom do meio ambiente que conlevam, à par de movimentos especulativos para as grandes empresas da construcçom.

A Guardia civil detém sócio da Fouce e rouba dinheiro da associaçom

2006-02-20T09:13:00.000-08:00

No passado 14 de Novembro, a Guardia Civil espanhola roubou mais de 300 euros destinados à próxima construçom de um local social na Amaía. O acto de bandidagem emarca-se na denominada Operaçom Castinheira, que incluiu o assalto ao domicílio particular de um moço militante da Assembleia da Mocidade Independentista e também membro da Fouce de Ouro.
Os indivíduos, encapuzados e fortemente armados, irrompêrom a primeira hora da manhá na casa do nosso companheiro, conduzindo-o à Corunha e posteriormente à Dirección General de la Guardia Civil, em Madrid. Ademais, levárom da sua casa objectos vários (livros, publicaçons...) e dinheiro pertencente à nossa associaçom cultural, quantificado em mais de 300 euros.
Para além de solidarizarmo-nos com @s detid@s do dia 14, da Fouce de Ouro incluímo-nos na listagem de associaçons e grupos humanos danados por esta acçom repressiva, que procura tapar bocas e afogar o verdadeiro nacionalismo galego.
NOM O CONSEGUIRÁM !!
ADIANTE A LUITA DO POVO GALEGO !!

A associaçom ecologista ERVA e a associaçom cultural A Fouce de Ouro denunciam aterramento ilegal num rego do concelho de Ames

2006-02-20T09:10:00.000-08:00

O passado dia 30 de Novembro, membros da associaçom ecologista ERVA apresentarom umha denúncia ante o Serviço de Protecçom da Natureza da Guarda Civil contra os responsáveis dum aterramento sobre o Rego de Loureiros, na parróquia de Ames, do concelho do mesmo nome, por afectar gravemente a ribeira fluvial dum rego tributário do río Sar, a escasos quilómetros do espaço natural protegido pola Uniom Europeia (Lugar de Importáncia Comunitária da Rede Natura 2.000) denominado Ribeiras do Rio Sar.
Este aterramento supom a alteraçom do cauce e a ribeira fluvial dum rego, infringindo a normativa de protecçom do domínio público hidráulico, ao acumular a menos de 5 metros da margem do rego toneladas de terra procedentes das obras de desmonte e esplanaçom que a empresa Mahía efectúa para a construçom dunha urbanizaçom no lugar da Ventosa, no mesmo concelho de Ames.
Da-se o agravante que no prédio onde se depositarom estes desmontes já se detectarom acumulaçons de terra procedentes de obra, que foram denunciados hai três anos ante o mesmo organismo da Guarda Civil. Com o fim de evitar e corrigir este tipo de infracçons, no caso que agora nos ocupa também se apresentou denúncia administrativa diante do organismo Augas de Galiza.
Ao mesmo tempo, as associaçons citadas dirigirom escrito de denúncia à concelhería de Medio Ambiente e ao Alcalde da corporaçom de Ames, solicitando-lhe a retirada temporal da licénça municipal de obra na urbanizaçom da Ventosa à empresa Mahía, por esta empresa nom estar capacitada a levar avante esa obra sem garantir que nom afecte aos recursos naturais protegidos sitos no concelho, e até que nom demostre e certifique que as obras que ejecuta cumprem com a legislaçom existente.
As associaçons denunciantes consideram que num concelho como Ames, onde o crescimento urbanístico nom cumpre as mínimas consideraçons ambientais e se desenvolve seguindo critérios alonxados da racionalidade própria dum processo de ordenamento do território, as medidas de seguimento e controlo das obras devem ser exaustivas, com o fim de dotar dum mínimo de coerência a política ambiental dum concelho que afirma defender o património ambiental do seu território. Por esta raçom, além de exigir a Augas de Galiza a apertura dum expediente sancionador que obrigue aos responsáveis da desfeita a restaurar a zona afectada e ao estudo da possível comissom de delito ecológico, as associaçons denunciantes reclamam do concelho a aplicaçom de medidas excepcionais exemplificadoras, que impidam a comissom de delitos como o denunciado.